ਬੰਗਾਲ ਦੀ ਖਾੜੀ ’ਚ ਮੰਡਰਾਇਆ 'ਅਰਨਬ' ਚੱਕਰਵਾਤ ਦਾ ਖ਼ਤਰਾ: ਆਂਧਰਾ ਪ੍ਰਦੇਸ਼ ਲਈ ਹਾਈ ਅਲਰਟ ਜਾਰੀ

ਬੰਗਾਲ ਦੀ ਖਾੜੀ ਵਿੱਚ ਉੱਠਿਆ ਡੂੰਘੇ ਦਬਾਅ ਦਾ ਖੇਤਰ ਹੁਣ ਖ਼ਤਰਨਾਕ ਚੱਕਰਵਾਤੀ ਤੂਫ਼ਾਨ ‘ਅਰਨਬ’ ਦਾ ਰੂਪ ਧਾਰਨ ਕਰ ਚੁੱਕਾ ਹੈ। ਮੌਸਮ ਵਿਭਾਗ (IMD) ਵੱਲੋਂ ਜਾਰੀ ਤਾਜ਼ਾ ਜਾਣਕਾਰੀ ਅਨੁਸਾਰ, ਇਹ ਤੂਫ਼ਾਨ ਆਉਣ ਵਾਲੇ 48 ਘੰਟਿਆਂ ਦੌਰਾਨ ਹੋਰ ਭਿਆਨਕ ਰੂਪ ਧਾਰਨ ਕਰ ਸਕਦਾ ਹੈ। ਅਨੁਮਾਨ ਹੈ ਕਿ 27 ਅਕਤੂਬਰ ਤੱਕ ਇਹ 'ਬਹੁਤ ਗੰਭੀਰ ਚੱਕਰਵਾਤੀ ਤੂਫ਼ਾਨ' ਵਿੱਚ ਤਬਦੀਲ ਹੋ ਕੇ 28 ਅਕਤੂਬਰ ਦੀ ਸਵੇਰ ਤੱਕ ਆਂਧਰਾ ਪ੍ਰਦੇਸ਼ ਦੇ ਤੱਟਵਰਤੀ ਇਲਾਕਿਆਂ ਨਾਲ ਟਕਰਾਏਗਾ, ਜਿਸ ਕਾਰਨ ਭਾਰੀ ਤਬਾਹੀ ਦੀ ਆਸ਼ੰਕਾ ਜਤਾਈ ਜਾ ਰਹੀ ਹੈ।

ਸੋਮਵਾਰ ਸਵੇਰੇ ਜਾਰੀ ਸਰਕਾਰੀ ਬੁਲੇਟਿਨ ਮੁਤਾਬਕ, ਇਹ ਚੱਕਰਵਾਤ ਪੂਰਬ-ਮੱਧ ਬੰਗਾਲ ਦੀ ਖਾੜੀ ਵਿੱਚ ਸਰਗਰਮ ਹੈ ਅਤੇ 15 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਫ਼ਾਸਲੇ ਨਾਲ ਪੱਛਮ-ਉੱਤਰ-ਪੱਛਮ ਦਿਸ਼ਾ ਵੱਲ ਵਧ ਰਹਾ ਹੈ। ਸੋਮਵਾਰ ਅੱਧੀ ਰਾਤ ਤੋਂ ਬਾਅਦ ਇਸ ਦੀ ਤਾਕਤ ਹੋਰ ਵਧਣ ਦੀ ਪੁਸ਼ਟੀ ਕੀਤੀ ਗਈ ਹੈ।

ਇਹ ਤੂਫ਼ਾਨ ਅੰਡੇਮਾਨ ਦੇ ਸ਼੍ਰੀ ਵਿਜੇਪੁਰਮ ਤੋਂ 590 ਕਿਲੋਮੀਟਰ, ਵਿਸ਼ਾਖਾਪਟਨਮ ਤੋਂ 650 ਕਿਲੋਮੀਟਰ ਅਤੇ ਕਾਕੀਨਾਡਾ ਤੋਂ 730 ਕਿਲੋਮੀਟਰ ਦੂਰ ਹੈ।

28 ਅਕਤੂਬਰ ਦੀ ਸਵੇਰ ਨੂੰ ਇਹ ਬਾਪਟਲਾ ਅਤੇ ਵਿਸ਼ਾਖਾਪਟਨਮ ਦੇ ਵਿਚਕਾਰ ਯਨਮ ਖੇਤਰ ਰਾਹੀਂ ਜ਼ਮੀਨ ਨਾਲ ਟਕਰਾਏਗਾ।

ਟਕਰਾਉਣ ਸਮੇਂ ਹਵਾ ਦੀ ਗਤੀ 125 ਤੋਂ 140 ਕਿਲੋਮੀਟਰ ਪ੍ਰਤੀ ਘੰਟਾ ਤੱਕ ਪਹੁੰਚ ਸਕਦੀ ਹੈ।

ਚੱਕਰਵਾਤ ਦੇ ਪ੍ਰਭਾਵ ਕਾਰਨ ਤੱਟਵਰਤੀ ਆਂਧਰਾ ਪ੍ਰਦੇਸ਼, ਯਨਮ ਅਤੇ ਰਾਇਲਸੀਮਾ ਵਿੱਚ ਤੇਜ਼ ਹਵਾਵਾਂ ਨਾਲ ਭਾਰੀ ਗਰਜ-ਚਮਕ ਦੀ ਚੇਤਾਵਨੀ ਦਿੱਤੀ ਗਈ ਹੈ।

27 ਅਤੇ 28 ਅਕਤੂਬਰ: ਕਈ ਹਿੱਸਿਆਂ ਵਿੱਚ ਆਫ਼ਤ ਬਣ ਕੇ ਅੱਤ-ਭਾਰੀ ਮੀਂਹ ਪੈਣ ਦਾ ਅਨੁਮਾਨ ਹੈ।

29 ਅਕਤੂਬਰ: ਤੂਫ਼ਾਨ ਦੇ ਲੰਘਣ ਤੋਂ ਬਾਅਦ ਵੀ ਕਈ ਇਲਾਕਿਆਂ ਵਿੱਚ ਰੁਕ-ਰੁਕ ਕੇ ਭਾਰੀ ਬਾਰਿਸ਼ ਜਾਰੀ ਰਹੇਗੀ।

ਆਂਧਰਾ ਪ੍ਰਦੇਸ਼ ਰਾਜ ਆਫ਼ਤ ਪ੍ਰਬੰਧਨ ਅਥਾਰਟੀ (APSDMA) ਦੇ ਮੈਨੇਜਿੰਗ ਡਾਇਰੈਕਟਰ ਪ੍ਰਖਰ ਜੈਨ ਨੇ ਦੱਸਿਆ ਕਿ ਅਗਲੇ 72 ਘੰਟੇ ਸੂਬੇ ਲਈ ਬੇਹੱਦ ਨਾਜ਼ੁਕ ਹਨ।

ਪ੍ਰਖਰ ਜੈਨ (MD, APSDMA):- "ਸਮੁੰਦਰੀ ਤੱਟ ਦੇ ਨੇੜੇ ਰਹਿਣ ਵਾਲੇ ਲੋਕਾਂ ਨੂੰ ਤੁਰੰਤ ਸੁਰੱਖਿਅਤ ਥਾਵਾਂ 'ਤੇ ਜਾਣ ਦੀ ਸਲਾਹ ਦਿੱਤੀ ਗਈ ਹੈ। ਨਾਗਰਿਕ ਕੇਵਲ ਸਰਕਾਰੀ ਅਤੇ ਅਧਿਕਾਰਤ ਬੁਲੇਟਿਨਾਂ 'ਤੇ ਹੀ ਵਿਸ਼ਵਾਸ ਕਰਨ ਅਤੇ ਕਿਸੇ ਵੀ ਤਰ੍ਹਾਂ ਦੀਆਂ ਅਫ਼ਵਾਹਾਂ ਤੋਂ ਦੂਰ ਰਹਿਣ।"

ਪ੍ਰਸ਼ਾਸਨ ਵੱਲੋਂ ਸਥਿਤੀ 'ਤੇ 24 ਘੰਟੇ ਨਜ਼ਰ ਰੱਖੀ ਜਾ ਰਹੀ ਹੈ ਅਤੇ ਬਚਾਅ ਟੀਮਾਂ ਨੂੰ ਅਲਰਟ ਮੋਡ 'ਤੇ ਰੱਖਿਆ ਗਿਆ ਹੈ।